ERAYGA SOO DHAWEYNTA
KU SOO DHOWAADA WARGEYSKA SYDSOM
Waxaan si farxad leh idiinku soo dhoweynaynaa Wargeyska SYDSOM, oo ah madal warbaahineed oo madax-bannaan oo runta iyo xaqiiqada mudnaanta koowaad siinaysa, isla markaana aaminsan in saxaafaddu ay tahay farriin iyo masuuliyad ka hor inta aysan noqon xirfad.
Wargeysku wuxuu ku shaqeeyaa qaab waafaqsan shuruucda iyo xeerarka ka jira Boqortooyada Sweden, isagoo u hoggaansan anshaxa iyo mabaadi’da saxaafadda, sida saxnaanta, dhexdhexaadnimada iyo kalsoonida. Waxaan ku dadaalaynaa inaan wararka iyo xaqiiqooyinka u gudbinno sida ay yihiin, annagoo ka fog buunbuunin, marin-habaabin iyo warar aan sal lahayn, isla markaana ixtiraamayna xaqa akhristaha uu u leeyahay inuu helo xog la hubo, sax ah oo dheellitiran.
Ujeeddadeennu waa in SYDSOM ay idiin noqoto daaqad aad kala socotaan wararka gudaha Sweden, arrimaha bulshada, dhacdooyinka iyo mowduucyada khuseeya SOOMAALIDA ISWIIDHAN iyo dhammaan dadka daneeya arrimaha Sweden. Waxaan arrimahaas ka soo gudbinaynaa warbixin xirfadeysan oo ku salaysan ilo lagu kalsoon yahay iyo falanqayn masuuliyad leh.
Kalsoonidiinnu waa hantidayada ugu weyn. Sidaas darteed, waxaan sii wadi doonnaa inaan si hufan, daacadnimo iyo masuuliyad leh u shaqayno, si aan u noqono codka runta, madal loogu talagalay wada-hadal wax dhisaya, iyo buundo isku xirta war la hubo iyo akhristaha.
Ku soo dhowaada Wargeyska SYDSOM… halka ay runta tahay jihada aan raacno.